Monthly Archives: Agosto 2011

Hai un certo tempo que botou a andar o proxecto cinematográfico O divino ferrete, que mesmo conta con páxina web propia onde os máis curiosos han poder informarse cumpridamente.

O feito ten especial relevancia por canto constitúe unha das primeiras mostras —senón a primeira— de cinema pornográfico xenuinamente galego, eido no que, segundo informan os promotores da iniciativa, moito falta aínda por normalizar tamén idiomática e industrialmente en clave autóctona.

Pois ben, para axudar a aterraplenar unha miga esa lagoa, 2.0 Editora implicouse na aventura decidíndose a publicar o guión literario da cinta baixo o título homónimo.

Así pois, O divino ferrete pon por xunto as psicalíticas suxestións de cinco dos nosos máis arroutados creadores literarios das últimas fornadas: Alejandro Tobar, Begoña Paz, Diego Ameixeiras, Iolanda Zúñiga e Xabier Cid, acompañando as súas delicuescencias coa contundencia ilustradora de Héctor Barros.

Non hei ser eu quen trate de (des)convencer a ninguén sobre o (in)verosímil do festivo sexual de Lorena e Gloria, dama de honor e noiva que, nos días previos ao casamento desta última, deciden trebellar intensamente con todo canto apañan nos momentos e lugares máis insospeitados. Nin tampouco caerei na crítica fácil da falta de credibilidade dos diálogos ou da súa manifesta escaseza, pois, por riba de todo o anterior —sexa ou non—, préstame convidar a que se fisgue no volume, inzado de bo humor e desenfado, gaudium venéreo ao que, se consegue alegrar (no sentido que se queira), ben pouco máis pode pedírselle nestes tempos de crise, tan pouco excitantes.