Aínda que xa hai un certo tempo que leva circulando polas nosas librerías, non quería deixar de dedicar unhas liñas a un meritorio poemario coasinado por Eli Ríos e Eduardo Estévez: Rúa da cancela, galardoado no seu día co Premio de Poesía Erótica Illas Sisargas.
O medio cento de páxinas escritas a catro mans por Ríos e Estévez trazan a precisa xeografía dunha historia amatoria que agroma nos instintos e remata no éxtase. É unha viaxe iniciática de (auto)rrecoñecemento a través do Eros, nun diálogo a dúas bandas onde os textos de prosa poética alternan con poemas de verso curto e abrupto.
Configurado como unha particular partida de xadrez lúbrico, Rúa da cancela (nome de expresivas resonancias para os coñecedores da cartografía antropourbana coruñesa) explora a densidade da pel, o fascinio das pulsións entre os rochedos marítimos e o amor que, superada a barreira do galanteo tabernario, remata derramándose en fluídos nas persianas do mencer.
Os de Ríos e Estévez son poemas fotograma, telegrafía sensual e sexual, escrita arpada con arestas que seccionan os períodos con katanas rítmicas inapelables.
Poida que non sexa doado facerse con este Rúa da cancela, dignamente editado pola Asociación Cultural Caldeirón e o Concello de Malpica, mais de distribución mellorable. Agora ben, se a boa fada pon a un diante súa un exemplar, eu non deixaría de abismarme nel. A visión electrizará.
