Diario DC: Telexornal Díaz Castro

a       

Entre as moitas e moi interesantes iniciativas que dende o ámbito escolar se están a levar a cabo para homenaxear a figura do autor de Nimbos neste seu Ano Díaz Castro quero hoxe dar noticia dunha que salienta pola súa orixinalidade e grao de elaboración. Refírome ao Telexornal Díaz Castro do CPI dos Dices (Rois), que o pasado día 10 de abril ás 12:30h. se emitiu en directo dende a Cidade da Cultura de Compostela nunha sesión en streaming que puideron seguir on line todos os centros educativos de Galicia e, xaora, libremente quen quixer doutros ámbitos.

Presentado polas alumnas Alba Sorribas e Lara Barreiro, o informativo incluíu tamén no equipo outras compañeiras súas como reporteiras correspondentes en diversos lugares vencellados á biografía do poeta; a saber: Lidia do Cabo en Guitiriz, Andrea Castaño en Mondoñedo, Andrea Conde e mais Andrea Gil en Santiago e Sara Iglesias na Coruña.

Todas elas, coa voz en off da amentada Lara Barreiro e mais de Roi Gómez e a coordinación do seu profesor Luís Aldegunde, fixeron posible a emisión deste completo telexornal de media hora de duración, que posibilitou a interactividade vía twitter e que contou cunha entrevista en directo a un dos máximos coñecedores da obra diazcastriana, Luís González Tosar, á que se sumaron outras interviews a Xesús Alonso Montero, Rosa Aneiros, Alfonso Blanco Torrado, Darío Xohán Cabana, Xaquín Campo Freire, Mero Iglesias, Margarita Ledo Andión, Xosé Luís Rivas ‘Mini’ e o que escribe.

A través das palabras dos entrevistados e as reportaxes das correspondentes, o informativo percorre a biopoética do escritor nunha ensamblaxe moi ben orquestrada, na que o discurso das presentadoras vai fiando unha historia en imaxes suxestivas e atraentes, onde pode seguirse todo o esencial diazcastriano de xeito ameno e ben documentado.

Moi recomendable este Telexornal Díaz Castro realizado dende o CPI dos Dices, unha iniciativa admirable que comezou xa hai algúns anos e á que lle desexo longa e vizosa vida.

a

Esta entrada foi publicada en Literatura galega, Varia e etiquetada , , , , , , , , , , , , , , , , , , , , , . Garda a ligazón permanente.