Category Archives: Banda deseñada

Acabo a lectura —mellor debería escribir a visolectura— da suxestiva novela gráfica de Miguel Cuba Punto de fuga, unha nova proposta de Demo Editorial, selo que, xunto a El Patito, é hoxe un dos principais esteos editores da BD galega.

Punto de fuga narra en imaxes acompañadas de breves textos o día a día dun mozo que vive en Compostela e loita por atopar o seu lugar na sociedade, por integrarse vital e laboralmente, conseguir regularizar as súas avoltas relacións sentimentais e lograr dar un sentido ao seu futuro.

Cómpre dicir que se fai evidente o pouso autobiográfico do relato: o protagonista é un rapaz duns trinta anos (Cuba naceu en Lugo en 1982), estudou Belas Artes e ocupa o seu tempo en dar clases, aproveitar bolsas para novos creadores e, sobre todo, debuxar.

O que máis me atrae de Punto de fuga é a súa pegada crítica, a sutil e subversiva denuncia dunha sociedade que condena á pasividade, ao stand by, toda unha xeración moi ben formada pero sen posibilidades de desenvolver o seu potencial. Ese drama colectivo vai reflectíndose nas viñetas de Cuba que, como sabiamente sinala Miguelanxo Prado no prólogo ao volume, teñen “un certo punto de frialdade técnica, de debuxo técnico, froito do trazo limpo e regular, que lle dá obxectividade e que potencia moitísimo a credibilidade da historia”, non sendo tampouco menor o acerto no tratamento da cor que é “coherente con esta proposta gráfica, e a paleta cromática deslízase sen estridencias cara a tonalidades que van envolvendo o lector nesa atmosfera de desacougo calado, de pesadume e intranquilidade normalizadas que tinxen a vida do protagonista”.

Unha atractiva aposta este Punto de fuga, novela gráfica coa que Miguel Cuba se descobre como un sensible espectador do teatro mundo e as súas xeiras.