Tag Archives: Holocausto zacoe

A traxectoria poética de Calros Solla debuxa unha liña ascendente que, duns anos para acó, inflexiona ata alturas máis que notables. As máis recentes mostras do que afirmo son os libros MazinGZ, co que obtivo o Premio Johan Carballeira, e mais Holocausto zacoe, co que gañou o Certame de Poesía Victoriano Taibo. Sobre deste último quixera agora dicir dúas palabras.

Holocausto zacoe non un é libro de versos ao uso, é un urro esconxurador, o gargallo que cospe á cara dos seus executores o condenado a morte na súa derradeira xeira. Os poemas deste libro denuncian a actual doma e castración da nación zacoe, a súa sumarísima devastación por parte do “Estado Maior das ZZ” e o seu brazo armado, a “Oficina de Asuntos Indíxenas”, encargados de reducir a cinza a etnia aborixe zacoefalante.

Os textos de Solla emparentan naturalmente co Far-west de Carlos Negro e a Mongólia de Igor Lugrís, constituíndo estes o tríade dos mellores poetas sociais galegos do século XXI, herdeiros, por dereito propio, da estirpe currosiana, leiraspulpeiriana, celsoemiliana.

Hai en Solla virtuosismo epigramático, mestría satírica e habelencia paródica que varren tal un tsunami calquera reticencia lectora, pois quen queira que se achegue a este excepcional Holocausto zacoe por forza ha de se render á súa sutileza de malabar verbal, á definición lapidaria e a ironía debeladora, humor necrosado e irreverente que aguilloa a conciencia, que fere e laña e eviscera ata a medula, evidenciando a pasividade que nos inmobiliza ao contemplar a morte da nosa nación zacoe. Non sexas cómplice: le.

[Co título "Esconxurador urro", publicado nos xornais Faro de Vigo, 19-1-2012 e La Opinión, 28-1-2012]